ونهاية الأمر وطالما واصحاب القرار يتحدثوا عن سلام وخارطة طريق وزواج وزفه وما فيش حسم عسكري والحوثي والقوى المعنية باستعادة الدولة عسكرية وسياسية ومقاومة شعبيه تائهة محبطة لا لها بالعير ولا بالنفير وطالما الحوثي باقي سواء كان بخارطة طريق او بخارطة صميل ليش زعلانين انه طبع عملة جديده خاصه به ان شاء الله يطبع عمله ورقيه وعليها صور قاسم سليماني مش بس عمله معدنيه عليها دار الحجر أيش بتسوو ولا حاجه بيانات وتنديدات ومنشورات وكتابات وتحليلات ممله هذا كل ما تستطيعوا القيام به النواح ثم النواح ثم النواح.
-ايش سويتوا لما فصل العملة
ولا حاجه.
-ايش سويتو لما منعكم من تصدير النفط
ولا حاجه
-ايش سويتوا لما رفض يصرف المرتبات من ايرادات ميناء الحديدة
ولا حاجه
-ايش سويتوا وهو مسيطر على الاتصالات والانترنت ويستحوذ على ايراداتها المقدرة بترليون ريال سنوياَ
ولا حاجه.
-ايش سويتوا لما عمل نقاط جمركية بمدخل كل مدينة.
ولا حاجه.
-ايش سويتو وهو يقتل اليمنيين ليل ونهار ويفجر منازلهم على رؤوسهم
ولا حاجه.
-ايش سويتوا وهو مشعلل الجبهات على مدار الساعة وكل يوم ندفن العشرات.
ولا حاجه
ومثل كل حاجه سويها ولا قدرتو تسوو به حاجه عيطبع فلوس ويحكم ويعمل اللي يشتي ونفس الشي ولا بتقدرو تسوو به حاجه.
لا قدرتوا تحاربوه اقتصادياً
ولا استكملتوا محاربته عسكرياً
لا تواريتوا بكرامة ولا واجهتوا بشجاعه.
ياساده انتم هوان على هوان على هوان ومن يتهيب صعود الجبال يعش ابد الدهر وسط الحفر..
ياساده انا مواطن يمني مذبوح من الوريد الى الوريد محبط مثل كل ملايين اليمنيين الباحثين عن وطن لا يمتلكوا على وجه الارض الا منازلهم في قراهم وكرامتهم يلعن هوانكم وتردد لعناته كل قطرة دم سفكت وتسفك على مدار الساعة بالجبهات وكل مسامة جلد وعظمة جسم الاف الشهداء وكل تنهيدة ثكلى وصرخة اب مكلوم ودمعة يتيم وذل مشرد ونازح وانكسار رب أسره تقتله الحسرات ويدفنه التعفف.
لماذا تنوحوا ك الثكالى اصمتوا اثابكم الله لقد مللنا صوت نواحكم سئمنا عجزكم، كرهنا انفسنا وكرهناكم.
سوف يطبع عبدالملك الحوثي ويطبع ويطبع ايش بتسوو وهو طارح رجل على رجل برضاكم بموافقتكم سوف يطبع ويعمل كل مايريد ولا بتقدروا تسوو حاجه لو كان به شمس كانت من امس كما يقول المثل اليمني ولهذا وبجاه الله وبحق هذه الايام المباركة اللي 70% من اليمنيين تذبحهم حسرات الحاجة ومرارة الفاقة.. اتمردغوا بحياة البذخ والثراء والاموال والمناصب انتم وعائلاتكم ودعونا وغلبنا وقهرنا ولا تثقلوا علينا بنواحكم الكاذب وبياناتكم وتصريحاتكم المرتعشة الضعيفة لانها تخبطنا فوق ما نحن فيه من إحباط اكرمونا بسكاتكم واصمتوا اثابكم الله..
طفشنا..
